Monday, 20 February 2017

तुझ्या अंगणीचा ऋतू

तुझे चांदण्याचे हात
माझे सुने अवकाश
तुझ्या उरामध्ये वारा
मला रेशमाचे पाश

तुझे गाव मनोहर
माडा माडातली वाट
माझ्या गावातून जाते
कोरडीशी पायवाट

तुझ्या नावाचे वलय
लाल घडीच्या पायऱ्या
माझे घरटे चिऊचे
कुणी सगा न सोयरा

तरी साद मी घालता
तुझ्या मनाच्या मातीला
तुझ्या अंगणीचा ऋतू
माझ्या अंगणात आला

-बागेश्री

1 comment:

  1. तुझ्या-माझ्यात एक नात आहे...ते किती भावगर्भ आहे, हे बागेश्रीच्या शब्दांत साकार होताना तुझी संपन्नता आणि माझे रितेपण "चांदण्यांचे हात" आणि "सुने अवकाश" होतात....त्याचप्रमाणे, एकेक प्रतिमा ही कवयित्री सुंदर रांगोळी मांडावी, तशी मांडत जाते."वारा आणि पाश", 'माडा माडातली वाट आणि कोरडी पायवाट",'लाल घडीच्या पाय-या आणि सगा न सोयरा ...चिऊचे घरटे"....ह्या शब्दांचे सामर्थ्य केवळ अर्थान्वयी नसून चित्रकलेसारखे मन:पटलावर चित्र रेखाटणारे आहे.

    ReplyDelete