इंद्रधनू

घडी करून
नीट दुमडून ठेवलाय मी
आठवणींचा रंगीत पंखा..
घरी कुणी नसताना
मन निवांत असताना
अलवार हाती
बाहेर काढते
एक एक पातं उमलत
तो उघडत जातो
आणि घरभर
इंद्रधनुष्य पसरतं...

घराच्या तावदानातून
बाहेर झळाळू पाहतं
एक रंगीत गुपित
तेव्हा अधिकच सावध होत
मी मिटून घेते त्याला
आणि बघता बघता
इंद्रधनू गुडूप होतं...

त्याने क्षणभरात
विखुरलेले रंग मात्र
अनेक दिवस घरात
इथे- तिथे चमकत राहतात...

-बागेश्री

Post a Comment

0 Comments