Saturday, 20 August 2016

गाभारा

पडल्याजागीच चाचपडून पहावं
एखाद्याचं अस्तित्व
आपल्या आठवणीच्या गाभा-यात
आणि हात पोकळीत नुसताच फिरत रहावा..
जाणवू नयेत
ओळखीचे स्पर्श,
मखमली संदर्भ
कळावं
ह्या गाभा-यात आता नांदतो
फक्त गार काळोख...
घ्यावं समजून की
आपण गाठलाय किनारा शांततेचा
जिथे उभा असतो हा गाभारा
एकटा.... श्रांत, निश्चल!

तेव्हा,
तेववून टाकावा
एक नंदादीप याच गाभा-यात
आणि मिणमिणू द्यावा सर्वत्र ... हलका.. मऊ उजेड 
कोण जाणो
वादळात वाट चुकलेल्या
एखाद्या मुसाफिराला
किना-याची
दिशा तरी गवसेल...

-बागेश्री

Featured post

मला भेटलेली गाणी: अप्सरा आली

.... चित्रलेखा लगबगीनं ह्या दालतानातून त्या दालनात, दिसणार्‍या प्रत्येक दास- दासीला काही ना काही अखंड सूचना देत चालली होती. आजचा तिच...